صرخة الوجدان

تظل يحسين صرخة وفه الوجدان
دينك بالدمه حيته والاركـــــــان
والزاير رجاءه ياخذه الصك *** مشّايه يجي غايته وصلك
**********************
ماخاب الكصد بابك رجاءه
بيقيه أو ذمِّته أمحبتــــك ولاءه
تعرف بيه وبعهده أو فاءه
وتدري أبنيِّته وكلبه أو صفاءه
سرج كلبه أعله درب الموت لوفاك
وبجدمــــه يدوس خشومها أعداك
موالي مابخل بجفوفه لجلك ***مشّايه يجي غايته وصلك
************************
يحب درب المنيَّه أيوصلَه يمّك
ودمَّه أيفيض ويَّه فيض دمّك
يحس بروحه وفّه الساع لمَّك
الماكدرت تحضنك أو تشمَّك
يواسي دموعها أبكطعت المنحر
وصرخات الضمير الله أكبــــــر
يمنِّي الروح دربك أله مسلك *** مشّايه يجي غايته وصلك
************************
طبر راسه عليك وسال دمعه
وبنيته يوَّفي امَّـــــــك البضعه
ويوم اليأذن الباري الرجعه
جندي أوياه روحه أول الدفعه
حياته يدري ماتسوه بلياك
دنيه وآخره منصور بحماك
حته لو زحف شوكه يردلك ***مشّايه يجي غايته وصلك
************
تعرف زايرك من هجر داره
يصد لبعيد عالكبـــــــه ومناره
على بابك وكف يطلب الجاره
يعرفك حاضر أبرهن الاشاره
يم بابك رسه بجناح صبره
يسوم أعليك ضلع أمَّك الزهره
أبدمعاته توضَّه من كصدلك *** مشّايه يجي غايته وصلك
*********************
عله اعتاب الزمن كلمه يخطها
ومصير أيامه بمحبتك ربطها
كـــــــل أذنوبه يم بابك يحطها
وحروف المصير أتحط نقطها
رجاءه مايخيب وانتـــــه رجواه
بروحه ونبض كلبه عايش أوياه
أيترجّه أمروِّتك أو طيب أصلك **مشّايه يجي غايته وصلك
*****************