خالد محمد مهدي الحجار \\قصيدة ((شسولف ياعلي الكرار ))

((شسولف ياعلي الكرار)) لسان حال العقيله

**---------------------------------------**

عليمن الوجه يندار ** شسولف ياعلي الكرار

أشوفه أنذبح كدّامـــي**ونار الحركت خيامي **وهامت بالفه أيتامــي

شسولف ياعلي الكرار

******************

أحضرني يبويــه بطبرة المحراب **وجيب وياك بســــمار الهظم والباب

ولاتنسه جبد بسموم جعده أنصاب ** وحضِّر كلب الك العانه جم مصاب

يبويه تدري ما احتار == أعاين عالجثث طشار

بأشرف موقف وسامي ** عليَّه بجت أيامي ** وتداوي جروح آلآمي

شسولف ياعلي الكرار

******************

شسولفلك يحيدر وحجي عن ياهم **مصيبة أمي طبرة راس جبد أنسم

عليّ ردهن زمانـــي وراد يتحكّم ** وجرح حسين جمَّلهن وبيهن تـــم

تعال أحضرني شوف الصار== عطش خوف ومرار ونار

ماتت حتَّه أحلآمي **اخويه من وكع دامي** مسلَّب عالثره ظامي

شسولف ياعلي الكرار

******************

انشدك تحضر الشدّتي أتعايّني **يبويه عن أخُوتي وحالي باصرني

دمع عيني يجاوب لو تسائلني ** الدهر بمصايبه من هلي حارمنـي

من بعدك زماني دار == حتَّه مارحم لزغار

كاصد كلبي وأيلآمي ** سطرني وللنظر عامي **عنّي وينه ليحامي

شسولف ياعلي الكرار

******************

أمر بين الجثث وأعرف ملآمحهه ** وأعرف ياسهم ياسيف ذابحهه

هاي الملحمه عيوني تصابحهه** أنتصر لحسين بيهه ودمَّه رابحهه

بدور أعله الثره أنوار == حسين وصحبته الاطار

وآني ثابته أجدامي **بيقيني وديني وأسلامي ** أحصّل منَّك وسامي

شسولف ياعلي الكرار

******************

كل لحظه الشماته تصد ضعن حسين **وكل دمعه حزينه أمتانيه الجفّين

كلهه أتصيح وينه أبو فاضل وين **بعد ياجف بكه أينشّف دموع العين

وينه سيفك الفقار == أحضرنه يحامي الجار

الصبر منَّك وأقدامي **ياكل هلي وأنسامي** عذابي نظرت الشامي

شسولف ياعلي الكرار

» خالد محمد مهدي الحجار \\ قصيدة (( حضر ملك الموت ))
» خالد محمد مهدي الحجار \\ قصيدة(( آخر ليليه))
» خالد محمد مهدي الحجار \\ قصيدة ((يافرح عمري))