قصيدة ميـــــــــلاد الدمــــــــــــــــوع

(( ميلاد الدموع ))
***********
ثالث نور للعتره أنولد هل اليوم
من نور الزجيَّه شعَّت انواره
سر عرش الصبر متحيّر بسرهه
سر زينب عجيب غميكَه اسراره
ثلاثه أتحالفن مافاركَنهه دوم
يفرحن بيهه لو شافنهه محتاره
دمعه وآه والنوح أبتلت بيهن
بدنيه ماصفت ويّاهه غدّاره
أنحنت يمهه الفضائل منهه تتعلم
طبع عدهه عجيبه للعقل داره
لازم منهه نترخّص ونوصفهه
واليعجز بوصفه أيقدّم أعذاره
عدهه من علي الكل معضله مفتاح
يم زينب الماينحل أله جاره
عاندهه الزمان عناد مثل أمهه
من الباب أخذ حد كربله ناره
وبوجه الخدر دار الحزن دمعات
تبجي الضلع وتعاتبه البسماره
بأعياد الولاده تستعد لهموم
جرح هارون يكَعد يحجي اخباره
يكَابلهه جبد مسموم بالفرحه
تشوف الفرحه عنده دموع تتجاره
بعد ياعيد مرهه وتفرح الحرَّه
بيا جرح وألم ينعاد تذكاره
ملك جان الخدر ماذلّته الاوجاع
تاجه بكربله ماظلَّت آثاره
تعبوهه العزيزه وحيل منهه أنهد
آه من الزمان وغدره وأشراره
يامولود نحييه وشمس تظهر
وبستان المودَّه كطعوا اثماره